Легендарната песна „Запејте сите ангели“, која првично го доживеа своето деби во 1991 година на сцената на „Фолк фест Валандово“ во изведба на незаборавниот Гоце Николовски, добива ново музичко руво и современ аранжман. Овој безвременски хит, кој низ годините стана симбол на македонската фолк музика, сега повторно се враќа пред публиката благодарение на популарниот пејач Спасе Антевски.
Со дозвола од оригиналниот композитор, маестралниот Горан Алачки, новата верзија добива свежина и нова енергија под продукциската палка на ТВ Плус. Аранжманот е дело на искусниот Слаѓан Станишковски, кој успеа да ја сочува емоцијата и суштината на песната, додека внесува современи звучни елементи што и даваат актуелност и уметничка димензија. Во новата верзија, се истакнува и ангажманот на врвни музичари: кавалот и зурлата на Гоце Димовски носат автентичен етно звук, тапаните и тамбурите на Мартин Илиевски ѝ даваат динамика, а гитарата на Глигориј Стојанов внесува топлина и ширина. Снимена во студиото на Ангел Ќосев, песната добива кристално чиста продукциска обработка која го истакнува секој инструментален слој.
„Ова не беше само идеја да се направи кавер, туку вистински предизвик – да ѝ се даде нова душа на песна што веќе има свое култно место во срцата на народот. Верувам дека музиката мора да се негува, но и да се развива. Оваа песна заслужува нов живот, нова публика и нова емоција“, изјави Спасе Антевски.
Со оваа интерпретација, Антевски не само што оддава почит на еден од највлијателните моменти во македонската фолк сцена, туку и потврдува дека квалитетната музика нема рок на траење. „Запејте сите ангели“ повторно пее, овој пат со нови крила, докажувајќи дека најдобрите песни не стареат – тие еволуираат.
Подготви: Андреја Андреевиќ