На 11 септември 2026 година, Белград ќе биде домаќин на еден од најемотивните музички настани оваа есен. Во дворот на Дорќол Плац ќе настапи The Amy Winehouse Band – оригиналниот бенд на легендарната Ејми Вајнхаус, составен од музичарите кои со години ја придружуваа на сцената и беа дел од создавањето на нејзиниот препознатлив звук.
Овој концерт има посебна симболика. Токму Белград беше градот во кој Ејми Вајнхаус го одржа својот последен концерт, па затоа оваа станица од светската турнеја на The Amy Winehouse Band носи дополнителна емоција и значење. Публиката нема да добие само концерт, туку искрена музичка почит кон една од најголемите уметници на 21 век. Бендот го предводи долгогодишниот музички директор, басист и близок пријател на Ејми, Дејл Дејвис, кој заедно со останатите оригинални членови го чува духот и автентичноста на музиката што ја направи Ејми бесмртна. Во улогата на вокал е извонредната Бет Морис, која со својот моќен глас ги оживува најголемите хитови на британската музичка икона.
„Ејми беше неверојатна. Имаше огромно срце и секогаш ѝ даваше сè на својата музика и на луѓето што ги сакаше. Нејзиното музичко наследство е бесценето и со овој проект сакаме да продолжи да живее низ целиот свет“, вели Дејл Дејвис.
Концертот доаѓа во година кога се одбележуваат 20 години од легендарниот албум „Back to Black“, како и 15 години од смртта на Ејми Вајнхаус, чие влијание врз современата музика останува огромно. Нејзиниот уникатен вокал, искрените текстови и препознатливиот стил и денес инспирираат милиони луѓе ширум светот. Публиката во Белград ќе има можност во живо да ги слушне безвременските песни од албумите „Back to Black“, „Frank“ и „Lioness“, меѓу кои се „Rehab“, „Back to Black“, „Valerie“, „You Know I’m No Good“, „Love Is a Losing Game“ и „Tears Dry On Their Own“.
Влезниците за концертот веќе се пуштени во продажба по промотивна цена од 3.900 српски динари, додека редовната цена ќе изнесува 4.500 динари.
Текстот го подготви: Редакција Музика24