По распродадени концертни сали, милионски прегледи на дигиталните платформи и статус на еден од најперспективните млади поп-изведувачи во регионот, Јаков Јозиновиќ го претстави својот прв студиски албум со симболичен наслов „Јас за чуда летим“.
Изданието содржи десет песни кои претставуваат спој на современ поп-звук, искрени емоции и модерна продукција што чекори во ритам со светските музички трендови. Покрај насловната композиција „Ја за чуда летим“, на албумот се наоѓаат и новите песни „На мјесту мом“, „4 Ласте“, „Мери“, „Вољела би то“, „Рај“, „Нечеш спавати“ и „Стол за двоје“, како и веќе добро познатите хитови „Ја волим“ и „Поље ружа“, кои освоија милионски прегледи, радиостаници и публика низ целиот регион.
Албумот е објавен во издание на K.S.V. Creation, а зад него стои тим од докажани автори, музичари и продуценти од различни генерации. Текстовите и музиката ги потпишуваат Лаура Сучец, Матија Цвек, Јосип Паламета, Јерко Дрљо, Драган Брајовиќ и Јелена Трифуновиќ, додека за продукцијата се погрижија Махир Сарихоџиќ, Марко Паламета, Срѓан Секуловиќ – Сканси, Томислав Пресечки и Зоран Швиги.
„Овој албум за мене е многу повеќе од десет песни. Тоа е приказна за последните неколку години од мојот живот, за луѓето што ги запознав, емоциите што ги доживеав и соништата што ги сонував. Секоја песна носи дел од мене и среќен сум што конечно можам да ги споделам со публиката. Благодарам на сите што веруваа во мене од самиот почеток, на авторите, музичарите и целиот тим, а најмногу на публиката која ми даде ветер во грб. Се надевам дека секој ќе пронајде дел од својата приказна во овие песни“, изјави Јаков Јозиновиќ.
Со ова издание, Јаков Јозиновиќ отвора ново и значајно поглавје во својата музичка кариера, потврдувајќи дека успехот што досега го постигна не е случаен, туку резултат на посветена работа, талент и автентичен музички израз. „Ја за чуда летим“ претставува заокружена музичка приказна која ја доловува зрелоста на еден млад уметник и најавува уште поголеми успеси на регионалната сцена.
Текстот го подготви: Редакција Музика24