Балканленд

Од коронавирус почина Сања Илиќ, фронтменот на „Балканика“

Музичарот Александар Сања Илиќ, основач на групата „Балканика“, почина денес на 70 години од последиците на коронавирус, откако веќе неколку дена беше поставен на респиратори.

Роден беше во 1951 година во Белград. Негов татко е композиторот Миодраг Илиќ – Бели, а брат му е композиторот Драган Илиќ од групата „Генерација 5“. Негова сопруга беше и сега покојната актерка Злата Петковиќ.

Сања Илиќ со сопругата Злата Петковиќ

Како млад настапуваше со групата „Враголани“, а потоа и во групата „Сан“. Неговиот најдобар пријател Предраг Јовичиќ – Трта, кој беше пејач на групата „Сан“, почина од струен удар за време на концерт во салата „Чаир“ во Ниш во 1975 година. Во спомен на него, тој го сними албумот „Спомени“. Во 70-те години на 20 век, тој компонираше музиката за химната на фудбалскиот клуб „Црвена Звезда“ по текстот на Љубивоје Ршумовиќ. Неговата песна „Хало, хало“ изведена од групата „Аске“ ја претставуваше Југославија на Евровизија 1982 година. Неговата песна „Принцеза“ во изведба на Слаѓана Милошевиќ и Дадо Топиќ беше кандидат во југословенскиот избор за Евровизија во 1984 година. Тој ја основа групата „Балканика“ во 1998 година, а првиот концерт се одржа на 26 јуни 2000 година. Настапуваше со „Балканика“ на концерти низ целиот свет. Тој ја претставуваше Србија на Евровизија 2018 во Лисабон, заедно со неговиот бенд.

Можеби ќе ве интересира: