Скопје синоќа стана центар на музичката магија, исполнет со гласот на легендарниот Пласидо Доминго. Во арената „Борис Трајковски“, овој светски реномиран тенор и диригент одржа величествен концерт, кој ќе остане во долгогодишно сеќавање на присутните.

Во својата 84-та година, Доминго покажа дека возраста е само бројка кога станува збор за уметноста. Со извонредна сценска енергија и вокална моќ, тој пленеше со италијански и германски арии, како и со шпански романси исполнети со љубов и страст. Неговиот настап беше вистинско сведоштво за исклучителната кариера што ја гради веќе повеќе од 50 години. Посебна ѕвезда на вечерта беше и сопранот Марија Жозе Сири, уметница со потекло од Уругвај и Италија, која првпат настапи со Доминго. Нивниот заеднички настап беше хармоничен, полн со емоции и музичка прецизност. Публиката беше восхитена од нивната синергија и од нивната способност да ја пренесат магијата на оперската уметност.
Музичката атмосфера ја збогатија Оркестарот и Хорот на Македонската опера и балет, под диригентската палка на маестро Марчело Рота. Со извонредна интерпретација, тие создадоа совршена музичка подлога за вокалната виртуозност на Доминго и Сири.

Публиката во салата беше воодушевена од спектаклот што се одвиваше пред нив. Коментарите по концертот беа исполнети со еуфорија и позитивна енергија. Иако концертот се одржа во спортска сала со пластични столчиња, тоа не ја намали магијата на вечерта. Единствената забелешка беше дека дел од посетителите не ги дочекаа бисовите и брзаа кон излезите, додека Доминго сè уште ја споделуваше својата уметност со оние што останаа.

Ова музичко доживување беше организирано од Прагма продукција во соработка со Македонската опера и балет, а концертот уште еднаш потврди дека Скопје знае да биде дом на најголемите светски уметници. Вечерта со Пласидо Доминго не беше само концерт – тоа беше емоционално патување, врата кон еден повисок музички свет, што публиката со воодушевување ја помина заедно со оваа жива легенда.
Подготви: Иван Јосимовски
Фото: Прагма продукција
