Во прв ред

Новогодишен концерт со душа: Зарина Првасевда ја обедини традицијата на Балканот во магичната вечер „Кадифено“

Во саботата, на 20 декември, во преполната сала на Македонската филхармонија се одржа новогодишниот концерт на вокалната уметница и интерпретаторка на традиционална музика Зарина Првасевда, насловен „Кадифено“. Концертот прерасна во вистинско музичко доживување, каде што традицијата, современиот пристап и интернационалната музичка извонредност се споија во еден заеднички звучен јазик.

Репертоарот опфати македонски традиционални песни, како и композиции од албанската, турската и влашката музичка традиција — песни кои со векови живеат на овие простори и ја градат нивната културна меморија. Преку внимателно избрани аранжмани и импровизациски сегменти, секоја композиција доби нова, современа звучна форма, без да ја изгуби својата автентичност. Специјални гости на концертот беа перкусионистот Ахмет Алан и виртуозот на фретлес гитарата Џенк Ердоган од Турција, добитник на Греми награда. Нивната музичка комуникација со ансамблот беше дочекана со долг и искрен аплауз, по што уметниците се вратија на бис, дополнително раздвижувајќи ја публиката.

„Бев исклучително среќен на овој концерт, најмногу поради комуникацијата што се создаде меѓу различните култури и традиции. Приказните зад секоја песна ми помогнаа подлабоко да навлезам во нивната емоција и интерпретација. Се чувствував како дома — како да свириме со пријатели, од срце“, изјави Џенк Ердоган, додавајќи дека со радост би се вратил повторно во Македонија.

За Зарина Првасевда, концертот претставува значаен уметнички чекор и премиера на нејзиниот нов музички опус.

„Настапот со уметници со светско значење е огромна чест и инспирација. Особено ме радува што традиционалната музика беше претставена од поинаков агол — како жива форма што комуницира со денешното време. Магичната атмосфера и реакциите од публиката ми потврдија дека оваа идеја беше препознаена и прифатена“, истакна Првасевда.

На сцената настапија и професорот и музичар Тони Арслан, македонскиот виртуоз на виолина, како и младата контрабасистка Андреа Мирческа, чие присуство донесе свежина и нова енергија во звучната слика на концертот. „Кадифено“ не е само концерт, туку концепт кој создава дијалог меѓу традиционалното и модерното, меѓу локалното и интернационалното. Проектот ја најавува и следната фаза во творештвото на Зарина Првасевда — концертен циклус што ќе продолжи и во текот на наредната година, со планови за снимање и издавање на нов албум, како и реализација на нов концертен проект.

Со „Кадифено“, традиционалната музика доби нов глас — нежен, длабок и современ, кој зборува подеднакво силно и до срцето и до времето во кое живееме.

JORDAN MITEV - SINE, SINE MOJ (OFFICIAL VIDEO)2025

Можеби ќе ве интересира: