Фестивали

Три дена музика, боемија и традиција: „Битолски Чалгиски Денови“ ја оживуваат Старата чаршија

Кога ќе се спојат богатата музичка традиција, боемскиот дух и препознатливата атмосфера на Старата битолска чаршија, резултатот е нов културен настан што веќе привлекува големо внимание. Од 14 до 16 август, во рамките на БИТ ФЕСТ, Битола за првпат ќе биде домаќин на фестивалот „Битолски Чалгиски Денови“, единствена манифестација целосно посветена на чалгиската музика.

Со ова прво издание, градот ќе оддаде почит на музичката традиција која со децении е дел од неговиот идентитет. Чалгијата, препознатлива по своите автентични инструменти, оригинални мелодии и силната поврзаност со битолските боеми, повторно ќе ги исполни улиците и чаршијата, враќајќи ја атмосферата од едно минато време.

Во организација на Културно-информативниот центар – Битола, фестивалот ќе понуди несекојдневна програма. Во текот на трите фестивалски денови, Старата битолска чаршија ќе се претвори во жива сцена исполнета со музика, традиција и староградски дух. Десетина чалгиски оркестри ќе настапуваат на повеќе локации, додека седум пајтони со мали музички состави ќе се движат низ чаршијата, создавајќи автентична атмосфера што ретко може да се доживее.

Свеченото отворање ќе биде вистински спектакл. Од Офицерскиот дом до Старата чаршија ќе продефилираат седум пајтони со музичари и околу стотина учесници облечени во староградски носии, реконструирајќи дел од некогашниот изглед и дух на Битола. Дополнително, во централниот дел на чаршијата ќе биде уреден простор со традиционални кафеани, каде посетителите ќе можат да уживаат во музиката и боемската атмосфера. Еден од најочекуваните моменти ќе биде концертот на Оливер Јосифовски и неговите пријатели на 15 август, кога официјално ќе биде промовиран новиот албум „Песни од Офицерски“, проект кој ја продолжува и негува традицијата на битолската чалгија. Ден претходно, на главната фестивалска сцена ќе настапи Битолскиот чалгиски оркестар, а фестивалот ќе биде затворен на 16 август со утринскиот концерт „На кафе со чалгиите“ на Тумбе Кафе.

Чалгиската музика претставува едно од највредните обележја на битолското културно наследство. Нејзиниот препознатлив звук е создаван под влијание на различни музички центри како Истанбул, Солун, Дамаск, Виена и Париз, а низ годините станал симбол на градската музичка култура и боемскиот начин на живот.

Со „Битолски Чалгиски Денови“, Битола не организира само нов фестивал. Градот отвора ново поглавје во зачувувањето и промоцијата на своето музичко наследство, создавајќи настан кој има потенцијал да прерасне во една од најпрепознатливите летни културни манифестации во Македонија.

Текстот го подготви: Редакција Музика24

Можеби ќе ве интересира: