Музика на кирилица

Марјан Коцев: Секогаш кога ќе ја слушнам „Виски“, се враќам на најболните моменти од животот (Фото)

Некои песни се хитови. Други стануваат дел од животот. Токму таква е приказната за „Виски“, една од најубавите урбани балади во кариерата на Марјан Коцев, која цели 14 години по своето објавување конечно ќе добие и официјален видеоспот.

Иако одамна е создадена, „Виски“ никогаш не престана да живее меѓу публиката. За Марјан Коцев таа отсекогаш била многу повеќе од песна – таа е спомен, емоција и сведоштво за еден период кој засекогаш оставил трага во неговиот живот. Автор на музиката е Николчо Коцев, текстот го напиша Орце Зафировски, а аранжманот е дело на Дејан Момироски. Новиот видеоспот е реализиран во продукција на Арт Студио продукција и Балкан Мјузик телевизија, а се снимаше во хотелот „Панорамика“ и на повеќе атрактивни локации низ Скопје.

Но, зад ова видео не стои само уште едно музичко издание. Стои една животна приказна.

„Виски“ никогаш не престана да биде мојата омилена песна. Ја снимивме пред 14 години, но отсекогаш чувствував дека заслужува видеоспот. Кога ја создававме заедно со брат ми Никола, минувавме низ многу тежок период. Мајка ми беше во болница, сите тие моменти останаа засекогаш врзани за оваа песна. Затоа секогаш кога ќе ја слушнам, ме враќа назад… ме погодува право во срце. Можеби токму затоа толку долго чекав да ја овековечам со видео“, открива Марјан Коцев.

Неговата исповед открива дека видеоспотот не е направен затоа што песната повторно е актуелна, туку затоа што конечно дошло вистинското време таа да ја добие визуелната приказна што ја заслужува. Понекогаш најголемите песни не се оние што освојуваат награди, туку оние што остануваат засекогаш во срцето на својот автор. Но, „Виски“ е само почеток на новото музичко поглавје на Марјан Коцев.

Во моментов тој работи и на видеоспот за новата верзија на „Рајот на земјата“, композиција која со години важи за неформална химна на Росоман. Со дозвола и во договор со авторот Ристо Минов, песната доби нов аудио-запис, а снимањето на видеото веќе е во тек. Истовремено, целосно е преснимена и легендарната „Солзи нека пресушат“, песна со која Марјан настапи на фестивалот „Цветници“ во 1995 година. И оваа безвременска балада наскоро ќе добие нов видеоспот.

Покрај новите музички проекти, Марјан Коцев подготвува и долгоочекувано враќање на американската сцена. По пауза од цели 25 години, околу новогодишните празници повторно ќе замине на турнеја во Соединетите Американски Држави, заедно со својот брат Никола Коцев и оркестар од Тетово. Веднаш по американската турнеја, следува уште еден голем предизвик – солистички концерт, планиран пред Велигден следната година, кој ќе биде музичка ретроспектива на неговата повеќедецениска кариера и средба со публиката преку песните што оставија белег во македонската музика.

По 14 години, „Виски“ конечно ја добива својата вистинска слика. А можеби токму тоа е доказ дека најубавите песни немаат рок на траење. Тие само го чекаат вистинскиот момент повторно да ги допрат срцата на луѓето.

Текстот го подготви: Иван Јосимовски

Фото: Арт Студио продукција

Можеби ќе ве интересира: