Од Националниот ансамбл за народни игри и песни „Танец”, со радост и задоволство не информираат дека нашиот најпознат амбасадор на македонското фолклорно богатство во светот, замина на балканска турнеја, со концерти во Подгорица, Љубљана, Загреб и Бања Лука.
Публиката во регионот, секогаш знаела да ја цени извонредноста на „Танец” и со сигурност нестрпливо ги очекува овие уникатни музичко-сценски спектакли, што секогаш ги премостуваат културните разлики и сведочат за обединувачката моќ на раскошниот македонски музички фолклор. На претстојните концерти во Подгорица (20.9.2024), Љубљана (22.9.2024), Загреб (24.9.2024) и Бања Лука (27.9.2024), на големите сцени на КИЦ „Будо Томовиќ”, „Цанкарјев дом”, „Ватрослав Лисински” и салата „Борик”, ќе биде изведена раскошна музичко-сценска програма од различни периоди на ансамблот, во која ќе бидат одиграни изворните ора „Тешкото”, „Женско Чамче” и „Копачка”, како и дел од богатиот кореографски опус на Танец – спектакуларните кореографии „Жетварка”, „Мариовска тресеница”, „Малешевка” и „Радовишки собор”. Секако, нема да изостане и богатата вокално-инструментална програма на оркестарот и хорот на „Танец”, заедно со првенката Сузана Спасовска, кои за публиката ќе исполнат повеќе антологиски песни од богатата ризница на македонскиот народ, како безвременските „Да сум бистра вода”, „Девојче, девојче”, „Седна баба да вечера”, „Лено, ле, Лено”, „Кирјана вино продава”, „Море сокол пие вода на Вардарот” и многу други”, велат од „Танец”.

Турнејата е во рамките на јубилејната година на ансамблот, кога се прославува 75-годишнината од основањето и таа, како и останатите концерти во сезоната, се одвива под мотото Националниот ансамбл за народни игри и песни „Танец” на балканска турнеја под мотото „Танец – 75 години македонски код”.
