Фестивали

Бургас е новата европска музичка престолнина: Евровизија 2027 пристигнува на брегот на Црното Море

Бугарскиот град Бургас официјално е избран за домаќин на Изборот за песна на Евровизија 2027, со што најголемиот музички спектакл во Европа следната година ќе се одржи на брегот на Црното Море.

Одлуката претставува голема победа не само за Бургас, туку и за целиот туристички регион, вклучувајќи ги познатите летувалишта Сончев Брег (Sunny Beach), Несебар и Поморие, кои уште во мај би можеле да бидат преплавени со десетици илјади посетители, новинари, музички делегации и обожаватели на Евровизија од цела Европа.

Организаторите веќе ги потврдија и датумите на натпреварувањето. Двете полуфинални вечери ќе се одржат на 11 и 13 мај, додека големото финале е закажано за 15 мај 2027 година.

За организацијата на престижниот музички настан се натпреваруваа четири бугарски градови – Бургас, Софија, Пловдив и Варна. Во последниот круг останаа Бургас и Софија, а конечната одлука ја донесе меѓународна комисија составена од претставници на Бугарската национална телевизија (БНТ), Европската радиодифузна унија (EBU) и експерти кои со години работат на организацијата на Евровизија. При изборот биле анализирани капацитетите на арените, техничките услови, транспортната инфраструктура, сместувачките капацитети и можноста градот да одговори на високите продукциски стандарди што ги бара најголемиот музички телевизиски спектакл во Европа.

Правото да биде домаќин на Евровизија, Бугарија го доби благодарение на историската победа на пејачката ДАРА, која триумфираше на Евровизија 2026 со песната „Bangaranga“. Со освоени 516 поени, таа беше убедлив победник и кај националните жири-комисии и кај телевизиската публика, носејќи ѝ ја на Бугарија првата победа во историјата на ова натпреварување.

Одржувањето на Евровизија во Бургас се очекува значително да го зголеми интересот за бугарското Црноморие уште пред официјалниот почеток на летната туристичка сезона. Хотелите, рестораните, туристичките агенции, превозниците и локалните атракции во Бургас, Сончев Брег, Несебар и околните места би можеле да имаат огромен економски бенефит, додека милиони телевизиски гледачи ширум светот ќе имаат можност да ги запознаат природните убавини и туристичките потенцијали на бугарскиот брег.

Во периодот што следува организаторите ќе ги објават деталите околу арената во која ќе се одржи натпреварувањето, продажбата на билетите, придружните настани и транспортната организација. Со изборот на Бургас, Бугарија добива историска можност да организира едно од најгледаните музички случувања во светот, а регионот на Црното Море ќе стане центар на европската музичка сцена во мај 2027 година.

Текстот го подготви: Редакција Музика24

Можеби ќе ве интересира: