Со многу насмевки, аплаузи и искрена детска енергија, во НУЦК „Трајко Прокопиев“ во Куманово се одржа 21. издание на реномираниот фестивал „Распеано детство“, настан кој со децении ја негува и афирмира детската музичка сцена.
Во организација на Здружението за уметност, култура и заштита на културното наследство „Етно ризница“, а со поддршка на Општина Куманово, фестивалот и оваа година донесе богата и квалитетна програма, исполнета со нови композиции и млади таленти. На сцената беа изведени 15 песни, создадени од вкупно 20 автори, кои преку детските гласови добија своја посебна емоција. Младите изведувачи од Македонија и Србија покажаа завидно ниво на интерпретација, самодоверба и љубов кон музиката, освојувајќи ја публиката уште со првите тонови.
Фестивалот доби и интернационална нота, благодарение на учеството на гостите од Србија, со што „Распеано детство“ уште еднаш ја потврди својата улога како платформа за културна размена и поврзување на младите артисти од регионот. Покрај музичкиот дел, програмата беше збогатена и со настапи на танцови клубови од Куманово, кои внесоа дополнителна динамика и визуелен колорит, правејќи ја вечерта уште поразновидна и атрактивна.
Фестивалот, кој има традиција што датира од 1976 година, и покрај повремените паузи, останува еден од најзначајните настани од ваков тип во земјата. Неговата мисија – да им даде простор на децата да ја изразат својата креативност и љубов кон музиката – и оваа година беше целосно исполнета.
Настанот беше снимен од Македонската радио-телевизија, што ќе овозможи и пошироката публика да ја почувствува магијата на оваа музичка вечер. Како што истакна претседателот на Здружението „Ризница“, Драган Митевски, интересот кај авторите и годинава бил значителен, што е уште еден доказ дека детската музика има своја иднина.
„Распеано детство“ и ова издание го потврди она што одамна го знаеме – дека најискрената музика доаѓа токму од најмладите, а нивните гласови носат надеж, радост и една поубава утрешнина.
Текстот го подготви: Редакција Музика24