Музика на кирилица

Интересно, емотивно, возвишено… Биба Додева го промовираше албумот “Незаборавни” (Видео)

После пауза од речиси шест месеци кога реално поради коронавирусот никој и ништо не функционираше, конечно се случи и првата официјална промоција на музички проект. А ледот овој пак го скрши, кој не – ако не таа, една од најдобрите вокални интерпретаторки, пејачка во буквална и вистинска смисла на зборот, жена борец, хуманстка, мајка, баба… и пред се човек.

После неколку години повлекување од македонската музичка сцена, Биба Додева со големиот музички проект “Незаборавни” се враќа и продолжува онаму каде што застана, онаму каде што се беше некако поинаку и многу поразлично… за разлика од денес.

Музичкиот новинар Иван Бечковиќ ја отвори и започна промоцијата со претставувањето на албумот. Албумот “Незаборавни”, на кој што е работено речиси една година, содржи 11 преработени композиции од познати македонски автори и исполнители и две композиции кои се бонус, една која е од минатогодишното издание на “Охрид фест” со која Биба и ја понесе првата награда, и втората од овогодинешното издание на “Макфест”. Благодарение на авторите, и целата екипа која што има работено на ова ново музичко издание, хитовите: “Анушка”, “Виолина и гитара”, “Едно срце имам душо”, “Во бестрага”, “Скопје”… добиваат еден сосема друг аранжман, призвук и… во продолжение со задоволство ви препорачуваме да го погледнете видеото и ќе слушнете на што поточно станува збор.

„Мојот внук е мојата најголема поддршка. Долго време ме немаше со албум, и среќна сум што ова е првиот поп албум во оваа 2020 година. Подолго време немав желба и сила да запеам, но се сетив на мојата мајка која секогаш ми велеше дека треба да продолжам да пеам. Татко ми е тука, а мајка ми сигурно сега ме гледа од горе и се гордее што ја послушав. Продолжив да пеам поради неа, поради ќерка ми, татко ми, мојот внук, а заслужен за сево ова е мојот Баце Дојчин“, рече Биба пред пријателите.

Многу музичари од македонската музичка сцена дојдоа да ја поддржат Биба на овој нејзин специјален ден, меѓу кои ќе ги споменеме: Дарио, Александар Масевски, Џина Папас-Џокси, Григор Копров, Пере од Нокаут, текстописецот Огнен Неделковски кој дојде заедно со неговиот син композиторот Филип Неделковски, колумнистка и поетеса Ана Бунтеска, која е автор на текстот на песната „Како некогаш“, со која Биба лани победи на фестивалот „Охрид фест“.

Албумот е снимен во студиото „Блу“, а на него работеше Владимир Дојчиновски-Дојчин, Ташко Грујовски и Иле Спасев. Придружните вокали ги испеа Сара Пројковска.

Подготви: Иван Јосимовски

Можеби ќе ве интересира: