Американската ладино пејачка со македонско потекло, Сара Ароесте, вчера ја промовираше преработката на познатата народна песна „Од Битола појдов“ а со која ја најавува турнејата низ Македонија. Имено, Сара на 22-ри јули настапува на „Локум фест“ во Битола, на 24-ти јули на „Охридско лето“ а на 27-ми јули на „Скопско лето“.
Сара потекнува од еврејско семејство од Битола, кое до Втората светска војна живееше на самиот Широк сокак.
На преработката работеше екипа од Македонија и Израел а проектот е сниман минатото лето пред некогашната семејна куќа на предците на Сара во Битола. Македонски продуцент е Мими Марковски а свој креативен придонес дадоа Сефедин Бајрамов и Вевки Амедов како придружни вокали односно Амедов и како придружба на кларинет. Спотот е исто така сниман од македонска екипа а доработен е во Израел во склоп на пост-продукцијата.
