Деновиве што претстојат се резервирани за овогодинешното издание на Каменичко културно лето 2024. Настанот традиционално се одржува на Градскиот плоштад, а домаќините КИЦ Романса и Општината Македонска Каменица кои и овој пат најавуваат разновидна музичка програма и музички имиња кои ќе ги задоволат и најпребирливите музички сладокусци.
Вчера вечер во рамки на првата фестивалска вечер (26-ти август), а во чест на најголемиот каменички празник Успение на Пресвета Богородица – Ден на рударите, Каменичко културно лето 2024 година започна со програма која ги одбележи настапите на повеќе културно-уметнички друштва од земјава и странство, и тоа КУД „Вера Јоциќ“ од Македонска Каменица и културно-уметнички друштва од Србија и Бугарија.
Веќе денес. (27-ми август вторник ), публиката ќе ги види и чуе Наум Петрески, миленикот на младата генерација Огнен Здравковски и дамата која никого не остава рамнодушен и чија изведба на една од најубавите македонски песни „Заветна“ освои многу срца – Бојана Скендеровски.
Дел од втората вечер закажана на големиот православен празник Успение на Пресвета Богородица на 28-ми август среда, пак, ќе бидат рок легендите Ареа, рнб двоецот ДНК и гостинката од Србија – Слаѓа Алегро.
„Дојдете заеднички да го отвориме овогодинешното културно лето и заеднички да уживаме во прекрасните настапи на музички гости кои ветуваат одлична атмосфера и многу хитови“, се вели во поканата на домаќините.