На 8-ми април, со почеток во 20:30 часот, Македонскиот народен театар ќе биде домаќин на уникатно шоу кое ги спојува музиката и театарот – “Глумците пеат”. Вечер исполнета со хумор, енергија и незаборавни музички изведби ќе ги оживее спомените на едно гламурозно време, создавајќи магија на сцената.
Триесетина врвни актери од различни генерации ќе настапат во придружба на биг-бенд составен од извонредни музичари. Под режија на Дејан Пројковски, музичките аранжмани на Бобан Мирковски и кореографијата на Олга Панго, шоуто ќе биде водено од маестро Љупчо Мирковски. Оваа година, шоуто е инспирирано од филмската уметност и ветува сцена исполнета со ритам, страст и хумор.
“Глумците пеат” е единствена независна продукција од ваков обем во Македонија, каде сè започнува од празен лист хартија и се создава од нула. Идејата за ова шоу е дело на починатиот актер Марин Бабиќ, кој во 1992 година, заедно со своите колеги, ја основа оваа традиција за да покаже дека актерите, покрај тоа што глумат, знаат и одлично да пеат. Шоуто се одржува во чест на Светскиот ден на театарот, празник кој го слави заедништвото и креативноста.
Картите за овој неповторлив настан можат да се набават на билетарницата на МНТ и онлајн преку официјалната веб-страница на театарот. Бидејќи местата се ограничени, организаторите ги повикуваат љубителите на театарот и музиката да ги обезбедат своите карти навреме.
