Во прв ред

„Од Македонија во туѓина“ – концерт на Елена Андоновска во чест на Васка Илиева под ѕвездите на Охрид (Фото)

Македонската народна песна повторно ќе заживее во својот најавтентичен сјај на сцената на Античкиот театар во Охрид. На 4 август 2026 година, познатата македонска етно-фолк пејачка Елена Андоновска ќе го одржи својот солистички концерт „Од Македонија во туѓина“, музички спектакл посветен на доајенот на македонската народна песна – Васка Илиева.

Со овој концерт, Андоновска ќе ѝ оддаде искрена почит на жената која со својот единствен глас, препознатлива интерпретација и богат музички опус остави неизбришлива трага во македонската култура. Васка Илиева со децении беше амбасадор на македонската народна песна, а нејзините безвременски хитови и денес се пеат со истата љубов и емоција, како во Македонија, така и меѓу Македонците ширум светот. Публиката ќе има можност да ужива во внимателно осмислена концертна програма, во која Елена Андоновска ќе ги изведе најубавите, најемотивните и најпознатите песни од богатиот репертоар на Васка Илиева. Секоја композиција ќе биде потсетник на богатото македонско музичко наследство и на вредностите што со генерации се пренесуваат преку народната песна.

Концертот „Од Македонија во туѓина“ не е само музичка вечер, туку проект со силна културна и национална порака – да се зачува, негува и афирмира македонската традиција, да се оддаде заслужена почит на една од најголемите музички легенди и да се поттикнат новите генерации да ја продолжат љубовта кон народната песна.

Во магичниот амбиент на Античкиот театар, публиката ќе биде дел од вечер исполнета со емоции, спомени и гордост. Преку интерпретациите на Елена Андоновска, безвременските песни на Васка Илиева повторно ќе оживеат, носејќи ја истата сила, топлина и љубов кон Македонија што со децении ги обединува луѓето, без разлика каде живеат. Организаторите ги покануваат сите љубители на македонската народна музика да бидат дел од овој уникатен музички настан и заедно да ѝ оддадат почит на легендата чие творештво претставува едно од најголемите богатства на македонската музичка традиција.

И не заборавајте, 4 август, локација Антички театар Охрид, концерт на Елена Андоновска „Од Македонија во туѓина“ посветен на Васка Илиева. Билетите се веќе во продажба.

Текстот го подготви: Редакција Музика24

Можеби ќе ве интересира: