На 28-ми март, малата сала во Македонска филхармонија беше исполнета со емоции, носталгија и врвна музика. Балканската музичка ѕвезда Весна Писаровиќ одржа солистички концерт кој долго ќе остане во сеќавањата на присутните.
По подолг период отсуство од македонската сцена, ова беше нејзина прва средба со публиката во Скопје по многу години – и тоа на начин што ретко се доживува. Со внимателно одбран репертоар и уникатен пристап, таа им подари на присутните вечер исполнета со искрени емоции и врвна интерпретација. Иако веќе подолго време е посветена на џез музиката, Писаровиќ оваа вечер направи мост помеѓу минатото и сегашноста, комбинирајќи ги своите најголеми хитови со нова, пософистицирана музичка енергија. Публиката не остана рамнодушна – уште од првите песни атмосферата се загреа, а веќе по неколку минути салата пулсираше во ритамот на нејзиниот глас.
Посебен момент беше изведбата на емотивната балада „Љубовта е религија“, оригинално отпеана заедно со Владо Јаневски. Публиката ја прифати песната со воодушевување, пеејќи заедно со неа – сцена што создаде вистинска магија во салата.
Концертот продолжи со низа хитови кои и денес звучат свежо и моќно, а директната комуникација на Весна со публиката само ја засили блискоста и искреноста на целиот настан. Енергијата беше взаемна – секоја песна добиваше силен аплауз, а насмевките беа доказ за посебната атмосфера. Ова беше концерт што недостасуваше на македонската сцена – искрен, квалитетен и емотивен. Настан кој потсетува зошто музиката има моќ да обединува генерации.
После концертот пејачката се дружеше со македонските фанови со кои се фотографираше и си разменуваа впечатоци за концертот.
Голема благодарност до Евент продукција за организацијата и можноста македонската публика повторно да ужива во уметноста на една ваква ѕвезда. Останува надежта дека ваквите музички доживувања наскоро ќе се повторат – можеби и во уште поголема сала.
Текстот го подготви: Александра Блажевска