Музика на кирилица

Гаро Тавитјан со награда за животно дело

Кон почетокот на ноември, на музичкиот фестивал “Еврофест”, кој ќе се одржи во Скопје, награда за животно дело ќе му биде доделена на музичката легенда Гарабет Тавитјан. Бидејќи фестивалот е со меѓународен карактер, оваа година падна одлука наградата за животно дело да ја понесе токму познатиот и неуморен тапанар од Скопје. Неговата биографија е преполна со достигнувања, а професионалните и колегијалните принципи на овој легендарен музичар и ден денес ги отвораат вратите за него каде и да тропне, и на домашен терен, и на сите негови музички дестинации низ Балканот и пошироко.

Гарабет Тавитјан е врвен македонски тапанар, со ерменско потекло. Тој некогаш беше и член на култната група “Леб и сол”. Освен како тапанар, во неколку песни се појавува како вокал (како на пример песната “Распукала Шар Планина”). Претходно беше член на неколку други скопски групи, а подоцна е основач и на составот “Парамециум” во кој членуваа и неговите синови Диран и Гаро, кои сега се познати како “Браќата Тавитјан”.

Изминативе години, во двата албумски проекти за музичко обединување на Балканот- “Македонското срце чука во 7/8” на Браќата Тавитјан, Гарабет ја имаше клучната улога, обезбедувајќи ги најпознатите пејачки ѕвезди од бившите ју простори, негови колеги, соработници и почитувачи. Минатата година на Градскиот стадион во Скопје, по повод 8 септември, Денот на осамостојувањето на Македонија, се одржа концерт со сите тие пејачи, и во живо ги испеаја народните македонски песни, кои се најдоа на албумите. Најавено е и трето продолжение на албумот. Гарабет е еден од ретките вистински примери во македонската културна сцена и антологија, почитуван во земјава, на Балканот и во едни пошироки рамки.

Подготви: Редакција Музика24

Можеби ќе ве интересира: