Фестивали

Евровизија се врати дома: Базел блескаше во првото полуфинале

По точно 69 години, Евровизија се врати во Швајцарија – земјата каде што започна музичката магија во 1956 година. Првото полуфинале од 2025-та година се одржа синоќа во Базел, во салата „Свети Јаков“, во атмосфера на носталгија, еуфорија и силна конкуренција.

Од вкупно 15 земји, публиката и жирито избраа 10 финалисти кои ќе се борат за титулата во саботното финале: Шведска, Полска, Албанија, Исланд, Сан Марино, Естонија, Португалија, Норвешка, Холандија и Украина. Нажалост, Словенија и Хрватска не успеаја да се пласираат, и покрај интересните настапи и надежите дека ќе изненадат со поинаков пристап.

Шведскиот претставник Каи, со песната „Bara bada bastu“ (Во превод: Само сауна и ништо друго), буквално ја „загреа“ сцената, придружен од танчари обвиени во крпи. Обложувалниците ѝ даваат најголеми шанси на оваа ексцентрична песна, која се покажа како хит уште на пробите. Од друга страна, естонскиот репер Томи Кеш со провокативната „Espresso Macchiato“ ја подели публиката – додека делови од Европа го слават, Италија не ја прими топло неговата уметничка провокација.

Песната „Strobe Lights“ на белгиецот Ред Себастијан понуди визуелно спектакуларна кореографија, додека Украина и Холандија добија високи оценки и од стручните жирија и од гласачите.

Како и секоја година, трите земји со директен билет за финале – Шпанија, Италија и домаќинот Швајцарија – настапија без натпреварувачки притисок. Швајцарската сцена доби и водителска харизма преку Хејзел Бругер и Сандра Студер, кои ја водат програмата со комбинација на духовитост и класичен евровизиски шарм.

Во четврток, второто полуфинале ќе донесе уште 16 натпреварувачи на сцената, меѓу кои и претставниците од Србија (Принцот од Врање со песната „Мила“) и Црна Гора (Нина Жижиќ со „Добродошли“). Ќе настапат и големи фаворити како Австрија, Израел и Ирска, додека директни финалисти Германија, Франција и Велика Британија ќе ја претстават својата продукција без страв од елиминација. Финалето в сабота ќе собере 26 земји и ќе биде кулминација на уште едно незаборавно издание на Евровизија. Дали Шведска повторно ќе триумфира, или можеби ќе видиме неочекуван пресврт?

Можеби ќе ве интересира: