Иако со години важи за една од најуспешните и финансиски најобезбедените фолк пејачки на поранешните југословенски простори, Вера Матовиќ признава дека зад долгата музичка кариера се крие и голема лична жртва. Заедно со сопругот Ратомир Матовиќ, кој е хармоникаш, со децении успешно настапувала низ Европа, но токму честите турнеи и бројните настапи направиле да пропуштат многу моменти од растењето на нивните деца.
Нивната ќерка Виолета и синот Милјан денес водат мирен живот, далеку од јавноста. Виолета е доктор на науки, додека Милјан дипломирал економија во Соединетите Американски Држави. И покрај успехот на своите родители, тие никогаш не покажале интерес да бидат дел од естрадниот свет. Сепак, Вера признава дека најтешко ѝ паднал моментот кога нејзината ќерка, откако била на гости кај другарка, ја прашала:
„Мамо, кога и ние ќе ручаме заедно?“.
Токму тие зборови, како што раскажува пејачката, засекогаш ѝ останале во сеќавање и ја натерале сериозно да размислува да ја заврши музичката кариера. Но, бројните настапи и интересот на публиката ја задржале на сцената. Покрај музиката, Вера Матовиќ со години внимателно инвестирала во антиквитети, уметнички слики и стилски мебел. Денес живее во луксузен дом на белградски Дедиње, кој според српските медиуми се проценува на околу четири милиони евра.
Иако јавноста често зборува за нејзиното богатство, пејачката вели дека тоа не ѝ претставува гордост, туку потсетник на годините исполнети со напорна работа и многу пропуштени семејни моменти. Таа нагласува дека целиот свој имот го стекнала чесно, дека редовно ги исполнува даночните обврски и дека најголемата цена за успехот не биле настапите, туку времето што не можела да го помине со своите деца.
Текстот го подготви: Редакција Музика24
