Фестивали

Наградата „Никола Бадев“ годинава со посебна симболика на “Фолк Фест Валандово” – ќе ја врачи неговата ќерка Роска Бадева

Педесет години по смртта на легендарниот Никола Бадев, неговото име и понатаму одекнува со иста сила низ македонската народна песна. Годинава, Фолк Фест Валандово со особена почит му се поклонува на еден од најголемите македонски интерпретатори, човек чиј глас остави неизбришлива трага во музичката и културната меморија на Македонија.

Во чест на великанот, наградата за најдобра интерпретација повторно ќе го носи името „Никола Бадев“ – признание што за изведувачите има посебна тежина, бидејќи не ја вреднува само вокалната техника, туку и емоцијата, искреноста и способноста песната да допре до публиката.

Никола Бадев беше симбол на автентичната македонска песна. Во неговите интерпретации се чувствуваа и болката и радоста, и тагата и надежта. Неговиот препознатлив глас носеше достоинство, топлина и ретка музичка длабочина, поради што остана еден од најпочитуваните уметници во историјата на македонскиот фолк. Годинашното врачување на наградата ќе има и дополнителна емоционална тежина. На сцената во Валандово, признанието „Никола Бадев“ ќе го додели неговата ќерка Роска Бадева – момент што се очекува да биде еден од најтрогателните на фестивалот. Со тоа, фестивалот ќе испрати силна порака дека вистинските вредности и големите имиња никогаш не се забораваат.

Фолк Фест Валандово 2026 се одржува под слоганот „Да ни е жива песната македонска“, а 39-тото издание носи две фестивалски вечери исполнети со нови композиции, емоции и почит кон традицијата. Главната фестивалска вечер ќе се одржи вечерва, 27 мај, во салата „Јанко Узунов“ во Валандово, каде публиката ќе има можност да слушне 20 нови песни создадени во духот на македонската музичка традиција. Музичкиот дел е под водство на проф. д-р Илчо Јованов, додека директниот телевизиски пренос ќе се емитува на МТВ 1 со почеток од 20:30 часот.

Техничкиот директор на фестивалот, Ѓоко Павлов, истакна дека годинава се вложени многу труд, енергија и љубов за фестивалот да добие современо и достоинствено издание.

„Нашата цел е публиката да понесе убави емоции, добри песни и чувство дека Фолк Фест повторно блеска со полн сјај“, изјави Павлов.

Со нова енергија, модерна продукција и силна почит кон музичките великани, Валандово и оваа година останува местото каде што македонската песна продолжува да живее, да обединува и да ги поврзува генерациите.

Текстот го подготви: Иван Јосимовски

Можеби ќе ве интересира: