Метал бендот „Лавина“ од Ниш е новиот српски адут за јубилејното, 70. издание на Изборот за песна на Евровизија. Со песната „Крај мене“, енергичните рокери освоија вкупно 24 поени од жири и публика, доволни за убедлива победа и билет за најголемата европска музичка сцена.
Настапот беше сè освен обичен – гитарски рифови што „гризат“, силен вокал и сценска енергија што пулсираше до последниот ред. Публиката тоа го препозна, а СМС гласовите ја запечатија победата.
Фронтменот на „Лавина“ не ја криеше емоцијата по прогласувањето.
„Сакам да им се заблагодарам на нашите семејства, пријатели, девојки, на Ниш, на сите што веруваа во нас. И на нашата екипа – без вас ова немаше да биде можно. Вие сте цареви!“, изјави возбудено фронтменот на бендот и со особена гордост им се обрати и на членовите на бендот:
„Толку се боревме, без прилики, без поддршка, без глас. А од денес – имаме глас!“. Токму таа реченица стана симбол на нивната победа – триумф на упорноста над тишината.
Гласањето на жирито донесе интересна динамика:
- Зое Кида – 12 поени за „Лавина“, 10 за Зејна и „Југославија“, 8 за YANX,
- Алек Алексов – 12 за „Лавина“, 10 за ЛУ – КУ „Верувај“, 8 за Зејна,
- Нина Радојчиќ – 12 за „Лавина“, 10 за YANX, 8 за Зејна,
- Игор Паниќ Нучи – 12 за Зејна и „Југославија“, 10 за „Лавина“, 8 за Брата Пелина
- Александра Ковач (претседател на жири комисијата) – 12 за „Југославија“, 10 за „Лавина“, 8 за ЛУ – КА „Верувај“
Иако максималните 12-ки не беа едногласни, „Лавина“ константно добиваше високи оценки – стратегија што се покажа како клучна.
Со изборот на метал бенд, Србија испраќа јасна порака: автентичноста и силниот сценски идентитет немаат жанровски граници. Евровизија низ историјата знаела да награди храброст и оригиналност – а „Лавина“ токму тоа го носи. Дали балканскиот метал ќе одекне низ Европа? Ако се суди според енергијата од националниот избор – одекот веќе започна.
Текстот го подготви: Влад Петров