Интернационалниот ансамбл „Barcelona Gipsy Balkan Orchestra” го претстави новото видео со обработка на традиционалната македонска песна „Море сокол пие“. Оваа песна датира од 1837 година, а низ годините ја преработија неколку артисти помеѓу кои Ханка Палдум и Тоше Проески.
“Ова е средба со вечна мелодија чија тежина ги одбележа генерациите низ вековите. Поврзуваме три балкански земји во една приказна – две страни на Скадарското Езеро низ призмата на македонскиот сокол”, вели контрабасистот на оркестарот Иван Ковачевиќ.
Овој ансамбл, чие седиште е во Барселона, покрај песните на шпански, руски и ромски, изведува песни и на српски јазик. Тие неодамна го снимија албумот „Нова ера“ со новата пејачка, Италијанката Маргерит Абита. Многу критичари веќе ја оценија новата пејачка како феноменално освежување.
