Вчера во Скопје на 86 години од животот почина доајенот на македонската народна песна Анка Гиева. Беше дел од плејадата познати песнопојци – пејач со препознатлив и карактеристичен глас, која за музичката продукција на Македонската радио-телевизија има снимено безброј убави народни песни.
Родена во Скопје, Гиева била професионално вработена во Македонскиот народен театар (МНТ), а потоа во Државниот ансамбл за народни песни и игри „Танец“. За Радио Скопје снимила голем број антологиски народни песни, меѓу кои и „Ајде слушај, слушај калеш бре Анѓо“, „Пилето ми пее рано на сабајле“, „Елено, ќерко, Елено“, „Крај Вардара седеше“, „Да сум бистра вода”, „Отвори ми бело Ленче” и други.
Анка Гиева беше меѓу 13 легендарни музичари од областа на македонската народна музика кои во 2022 беа одликувани со Медал за заслуги од претседателот Стево Пендаровски. Одликувањето беше доделено за нивниот најголем придонес во негувањето, популаризацијата и во зачувувањето на македонската народна и изворна песна, како и за промоција и за афирмација на македонското музичко творештво и на културата во интернационални рамки.
Погребот ќе биде извршен утре во 12 часот на градските гробишта Бутел во Скопје.
