Музика на кирилица

Последно збогум за членовите на бендот ДНК

Во тага и болка, Македонија денеска се прости со членовите на бендот ДНК, кои трагично ги загубија своите животи во пожарот во дискотеката „Пулс“ во Кочани. Последното збогување со овие талентирани музичари се одржа на неколку различни локации низ земјата, каде што семејството, пријателите и колегите им оддадоа почит.

Пејачот на бендот, Андреј Ѓорѓиески, беше погребан на градските гробишта Бутел во Скопје. На погребот што се одржа во 10 часот, присуствуваа неговото семејство, бројни македонски уметници, пејачи, музичари и пријатели, кои со солзи во очите го испратија на неговото последно патување.

Членката на бендот и професорка на Факултетот за музичка уметност, Сара Пројковска, беше погребана на гробиштата во Лисиче. Погребот се одржа во 12 часот, каде што нејзините колеги и студенти се собраа да ѝ оддадат последна почит на жената која несебично го пренесуваше своето музичко знаење на идните генерации.

Младиот тапанар од Струмица, Ѓорѓи Ѓорѓиев, најде свој вечен мир на градските гробишта во Струмица. Неговите посмртни останки беа изложени во Градската капела од 12 часот, додека вработените во музичкото училиште каде што тој учеше и работеше, одржаа комеморативна седница во 10 часот.

Во црквата во штипско Ново Село, од 9 до 11 часот беа изложени телата на Филип Стевановски и Александар Коларов, кои беа дел од музичката поставка на ДНК, додека во истото време во црквата „Света Троица“ во Штип беше изложено телото на Александар Ефремов, уште еден талентиран музичар кој трагично го загуби животот во оваа несреќа.

Македонската музичка сцена загуби пет големи таленти, чии гласови и звуци ќе одекнуваат во спомените на сите што ги познаваа и ги сакаа. Нивното музичко наследство ќе продолжи да живее, а нивната трагична судбина засекогаш ќе остане болна рана во срцата на нивните најблиски и целата јавност.

Можеби ќе ве интересира: