Младата македонска пејачка и музичарка Ангела Влинтовска ја претстави својата нова авторска приказна – „Песно недопеана“, сингл кој е достапен на сите музички платформи, заедно со официјален видеоспот. Станува збор за песна што носи силна емоционална нота, а воедно претставува и нов чекор во развојот на младата уметница, која во изминатиот период се наметна како едно од најперспективните имиња на домашната музичка сцена.
Зад музиката, текстот, аранжманот и комплетната продукција стои Темелко Андреев, со кого Ангела ја реализира оваа музичка соработка. Во песната како бек-вокали се појавуваат Ангела Влинтовска, Мики Секуловски, Емилија Алексовска и Темелко Андреев, додека самата Ангела дополнително го збогатува звучниот колорит со свирење на виолина. Гитарата и бас-гитарата ги отсвири Оливер Тевчев. И визуелната приказна е целосно заокружена од Темелко Андреев, кој ги потпишува сценариото, режијата, монтажата, визуелните и звучните ефекти, како и постпродукцијата. Камерата е доверена на Темелко Андреев и Иво Иванов, кој ги реализираше и атрактивните снимки со дрон.
За Ангела, „Песно недопеана“ не е само уште една нова песна, туку проект во кој се вложени многу емоции, посветеност и љубов кон музиката. Со овој сингл таа испраќа јасна порака дека нејзиниот музички пат допрва започнува да се развива со полн интензитет.
Иако е млада, Влинтовска веќе зад себе има значајни настапи и искуства. Покрај тоа што е вокален интерпретатор, таа е музички образувана и свири виолина и виола, а своето класично музичко образование успешно го комбинира со современиот музички израз. Во 2025 година се претстави и пред регионалната публика преку музичкото шоу „Ѕвездите на Гранд“, каде што го привлече вниманието со својот талент. Нејзиното име на македонската фестивалска сцена првпат силно одекна во 2024 година, кога настапи на „Фолк фест Валандово“ со композицијата „Темјана“. Две години подоцна повторно беше дел од фестивалот, овојпат со песната „Вардар тече среде Скопје“, потврдувајќи дека континуирано работи на својата кариера. Особено успешна беше 2026 година, кога Ангела настапи и на „Охрид фест – Охридски трубадури“, каде што ја освои наградата за најдобар дебитант – признание што дополнително го потврди нејзиниот потенцијал и ја вброи меѓу најперспективните млади пејачки на домашната сцена.
Токму по овој успешен период, „Песно недопеана“ доаѓа како логично продолжение на нејзиниот музички развој. Со искуството стекнато на фестивалските сцени, новата песна претставува уште еден чекор напред и најава дека од Ангела Влинтовска допрва може да се очекуваат нови музички проекти. „Песно недопеана“ веќе е достапна на сите дигитални музички сервиси, а официјалниот видеоспот можете да го погледнете во продолжение.
Текстот го подготви: Редакција Музика24