Британскиот супергруп Coldplay испиша ново поглавје во музичката историја, станувајќи првиот бенд кој успеал да распродаде десет последователни концерти на стадионот Вембли во Лондон. Како дел од нивната рекордна светска турнеја Music of the Spheres, тие настапија пред речиси 900.000 обожаватели само во својата татковина. На последната вечер, фронтменот Крис Мартин со емотивен говор ѝ се заблагодари на публиката:
„Многу ми е мило што ве гледам. Ви благодариме што конечно ни дозволивте да се вратиме дома“. Тој откри дека иако турнејата продолжува до 2027 година, ова бил последниот настап на бендот во Лондон во блиска иднина.
Концертите на Coldplay одамна се препознатливи по уникатното искуство кое го создаваат. ЛЕД нараквиците (Xylobands), кои ги добива секој посетител, светат синхронизирано со музиката и го претвораат стадионот во огромна сцена на светлина и боја. Овој ефект ја прави публиката не само сведок, туку и активен дел од спектаклот.
Турнејата се истакнува и по својата зелена филозофија. Кинетички подови и соларни панели генерираат енергија за концертите, додека конфетите и нараквиците се изработени од биоразградливи материјали. Со ова, Coldplay покажуваат дека глобалниот рок-шоу бизнис може да оди рака под рака со грижа за животната средина.
Рекордот на Вембли е симбол на еволуцијата на бендот. Од интимните алтернативни балади во раните 2000-ти, Coldplay денес се кралеви на стадионските химни што обединуваат милиони луѓе. Комбинацијата на емотивни песни, визуелна раскош и општествена одговорност ги направи најуспешниот светски бенд на својата генерација. Со над 12 милиони продадени билети ширум светот, Music of the Spheres веќе е запишана како најпосетената турнеја во историјата. А десетте вечери на Вембли остануваат најсилниот доказ дека магијата на живиот концерт е неприкосновена.
Текстот го подготви: Влад Петров