По една деценија, „Тумбао салса бенд“ повторно ќе ја загрее скопската публика со концерт на 31 октомври во Македонската опера и балет, со почеток во 20 часот. Бендот, кој повеќе од 20 години го предводи познатиот музичар Петар Ренџов, последен пат имаше поголем концерт во Скопје во 2015 година, токму во Универзална сала – пред таа да ги затвори вратите.
Овојпат на сцената на МОБ, на „Тумбао“ ќе им се придружат и специјалните гости Ивана Стојановска, Биљана Ѓошева, Ристо Самарџиев и Мики Јовановски-Џафер, кои ќе ја збогатат вечерта со свои изведби.
„Приказната на „Тумбао салса бенд“ е единствена и специјална, носи со себе ритмика на карипскиот звук, кој ја проширува основата на македонската традиционална музика. Во овие 20 години создадовме автентичен звук и доживувања кои повикуваат на среќа, игра и љубов. Концертот ќе биде вечер на македонско-кубанска музичка среќа“, вели Петар Ренџов.

Последниот концерт на бендот во Универзална сала во 2015 година остана запаметен како еден од највеселите во тоа време. Столчињата од партерот беа отстранети, а водителката Марјана Станојковска и танчарот Илија Карадаковски ја учеа публиката салса чекори, претворајќи ја салата во вистинска танцувачка арена.
Скопјани повторно ќе имаат можност да ја почувствуваат таа енергија и да бидат дел од музичко патување што ја спојува македонската со кубанската традиција, со неизбежна доза на џез и многу радост.
Билетите за концертот се веќе во продажба преку мрежата на Мк тикетс.
Текстот го подготви: Иван Јосимовски
