За две недели на филмскиот фестивал во Кан премиерно ќе биде прикажан филмот „Елвис“, биографска приказна за познатиот пејач Елвис Присли и неговата врска со менаџерот, полковникот Том Паркер. Една од првите луѓе што го гледале филмот била поранешната сопруга на Присли, 76-годишната Присила Присли. Таа изминатиот викенд објави на Фејсбук дека е воодушевена од филмот во режија на Баз Лурман. Присила го гледала филмот на приватна проекција во Warner studios заедно со Џери Шилинг, стар пријател на Елвис.
“Ова е приказна за врската меѓу Елвис и полковникот Паркер. Станува збор за брилијантно и креативно раскажана вистинита приказна која само Баз, на неговиот единствен уметнички начин, можеше да ја сними. Остин Батлер, кој го игра Елвис, е неверојатен. На сред филм јас и Џери се погледнавме и си рековме „Леле“!!!. Браво за него”, напиша присила.
Во однос на улогата на полковникот Том Паркер кого го игра Том Хенкс и крајот на филмот, Присила додаде:
“Каков лик беше! Има две страни на полковникот, јас и Џери ги запознавме двете. Како што знаете, оваа приказна нема среќен крај. Мислам дека малку подобро ќе го разберете патувањето на Елвис, опишано од режисерот кој го вложил своето срце и душа во овој филм”.
